Histori Suksesi – Avokati mbron të drejtën e tij gjatë ushtrimit të profesionit dhe fiton betejën me organin publik në Gjykatën Administrative të Apelit

Klienti ynë është një avokat nga Tirana, të cilit iu refuzua dhënia e informacionit lidhur me dokumentacionin e trajtimit nga Agjencia e Trajtimit të Pronave (ATP) të pronësisë së shtetasit A.A, dokumentacion që krijonte mbivendosje të dukshme me pasurinë e shtetasve të përfaqësuar. Refuzimi u justifikua nga organi publik me pretendimin se avokati nuk ishte “palë e legjitimuar” për të kërkuar këto të dhëna.

Avokat Kastriot Frashëri, në cilësinë e përfaqësuesit me prokurë të shtetasve Xh.V dhe E.V, i kërkoi Agjencisë Kombëtare të Kthimit dhe Kompensimit të Pronave (AKKP) informacion zyrtar mbi dokumentacionin e trajtimit të pronësisë së shtetasit A.A, e cila krijonte mbivendosje me pasurinë e klientëve të tij në zonën e Shkozetit, Durrës.

Kërkesa u mbështet në nenin 6 të Ligjit nr. 9109/2003 “Për profesionin e Avokatit”, i cili i njeh avokatit të drejtën për të kërkuar nga institucionet publike dokumente dhe të dhëna të nevojshme për ushtrimin e profesionit. Pavarësisht këtij parashikimi ligjor, AKKP refuzoi dhënien e informacionit, duke këmbëngulur se avokati nuk ishte palë e legjitimuar.

Në vitin 2015, Gjykata Administrative e Tiranës rrëzoi padinë, duke arsyetuar se e drejta për të kërkuar informacionin i përkiste vetëm personave të përfaqësuar dhe jo avokatit të tyre.

Avokat Frashëri e kundërshtoi vendimin, duke argumentuar se:

• Ligji për profesionin e avokatit i njeh avokatit të drejtë të drejtpërdrejtë për të kërkuar informacion nga organet publike;
• Mosdhënia e informacionit pengon ushtrimin e profesionit dhe cenon rolin e avokatit si garant i të drejtave të qytetarëve;
• Gjykata e shkallës së parë ka bërë interpretim të gabuar të ligjit procedural mbi legjitimimin aktiv.

Gjykata Administrative e Apelit Tiranë, pas shqyrtimit të çështjes, ndryshoi plotësisht vendimin e shkallës së parë dhe pranoi padinë e avokatit.

Në vendimin e saj, Gjykata theksoi se:

• Avokati është i legjitimuar të ngrejë padi për mosdhënien e informacionit, në bazë të nenit 6/3 të Ligjit nr. 9109/2003;
• Refuzimi i AKKP-së ka cenuar të drejtën profesionale të avokatit për të ushtruar profesionin;
• Padia kishte për objekt mbrojtjen e integritetit të profesionit të avokatit, jo interesat civile të klientëve;
• Veprimet e AKKP-së ishin të kundërligjshme dhe në kundërshtim me Ligjin nr. 119/2014 “Për të drejtën e informimit”, Kushtetutën dhe KEDNJ.

• Ndryshimin e vendimit të shkallës së parë;
• Pranimin e padisë së avokatit Kastriot Frashëri;
• Detyrimin e AKKP Tiranë për të vënë në dispozicion informacionin e kërkuar me shkresën nr. 2400, datë 01.06.2015.

Ky rast krijon një precedent pozitiv në jurisprudencën administrative shqiptare, duke konfirmuar se avokati, në ushtrimin e profesionit, ka legjitimitet të drejtpërdrejtë për të kërkuar informacion nga organet publike dhe se mosdhënia e informacionit përbën cenim të së drejtës për ushtrimin e profesionit.

Vendimi i Gjykatës Administrative të Apelit forcon standardet e shtetit të së drejtës dhe pavarësinë e avokatit si pjesë integrale e sistemit të drejtësisë.