Sukses Ligjor në Apelimin Tatimor: Shfuqizimi i Gjobës Tatimore për Tatimin në Burim për blerjet e përjashtuara nga persona juridikë jorezidentë në Republikën e Shqipërisë, me të cilat Shqipëria ka marrëveshje të shmangies së taksimit të dyfishtë dhe ku shërbimet e listuara taksohen vetëm në vendin e rezidencës

Avokat Kastriot Frashëri mbron me sukses klientin kundër Drejtorisë Rajonale të Tatimeve Durrës.

Në një rast të rëndësishëm për praktikën tatimore në Shqipëri, avokat Kastriot Frashëri arriti të mbrojë me sukses interesat e subjektit D… sh.p.k., duke kundërshtuar me argumente të forta ligjore një Njoftim Vlerësimi për Detyrimet Tatimore të lëshuar nga Drejtoria Rajonale e Tatimeve Durrës, me nr. prot. 0000, datë 26.02.2024. Ky vendim përbënte vendosjen arbitrare të një tatimi të dyfishtë të padrejtë mbi shërbime të kryera nga kompani jorezidente dhe ishte lëshuar në keqinterpretim të ligjit material dhe procedurial në fuqi.

Subjekti D… sh.p.k., një kompani që ofron shërbime të specializuara për industrinë fason në Shqipëri, u përball me një vlerësim tatimor në vlerën 5.5 milionë lekë, për tatim në burim mbi pagesa të kryera ndaj partnerëve jorezidentë. Ky penalitet u konsiderua nga avokati si i pajustifikuar ligjërisht, i përllogaritur gabim dhe në kundërshtim me marrëveshjet ndërkombëtare për shmangien e tatimit të dyfishtë që Shqipëria ka me vendet e origjinës së partnerëve të huaj të kompanisë.

Avokat Kastriot Frashëri ndërtoi një ankim të strukturuar dhe të argumentuar në disa nivele ligjore, duke përdorur:

• Ligjin Nr. 8438, datë 28.12.1998 “Për Tatimin mbi të Ardhurat”;
• Udhëzimin Nr. 5, datë 30.01.2006;
• Ligjin Nr. 9920, datë 19.5.2008 “Për Procedurat Tatimore”;
• Marrëveshjet dypalëshe për shmangien e tatimit të dyfishtë që Republika e Shqipërisë ka nënshkruar me shtetet përkatëse.

Në ankim u theksua se shërbimet e faturuara ishin të rregullta dhe të provuara me dokumentacion tatimor dhe bankar, subjektet jorezidente kishin paguar detyrimet në vendin e tyre të rezidencës, ndërsa aplikimi i tatimit në burim në Shqipëri do të përbënte tatim të dyfishtë të ndaluar nga marrëveshjet ndërkombëtare.

• Tatimi në burim nuk mund të aplikohet për shërbime të kryera nga persona juridikë jorezidentë, kur ekziston një marrëveshje e vlefshme ndërkombëtare për shmangien e tatimit të dyfishtë.
• Ligji ka përparësi ndaj udhëzimeve administrative dhe një udhëzim nuk mund të krijojë detyrime të reja që ligji nuk i parashikon.
• Dënimi i dyfishtë për të njëjtën shkelje proceduriale bie ndesh me parimin e proporcionalitetit dhe me frymën e drejtësisë tatimore.
• Vendime të mëparshme gjyqësore (përfshirë Gjykatën e Lartë Nr. 385 dhe Nr. 3816 dhe Gjykatën Administrative Tiranë Nr. 2454, datë 19.10.2020) kanë njohur si të ligjshme dhe të zbritshme shpenzime të ngjashme për subjekte jorezidente.
• DVTT Durrës nuk mund të vlerësonte dënimet sipas nenit 115, pika 1 të ligjit 9920, për dështimin e depozitimit të formularëve AL106013 dhe AL106013-118, sipas përcaktimit të nenit 30/1 të ligjit “Për tatimin mbi të ardhurat” dhe Udhëzimit Nr. 4, datë 21.2.2019 (pika q) e paragrafit 3.6), ku parashikimi është i qartë dhe nuk lë hapësira interpretimi.
• Komisioni i Apelimit Tatimor duhet të bëjë dallimin midis një dënimi që DVTT është e autorizuar të lëshojë dhe një dënimi të vlerësuar në mënyrë jo të duhur si rasti konkret.
• DVTT, në kundërshtim me procedurat ligjore, në vend të aplikonte gjobë për mosdorëzim formulari, i ngarkoi ankuesit detyrime fiskale në bazë të nenit 115, pika 1 të ligjit 9920.

Falë argumentimit juridik të saktë dhe dokumentacionit të plotë, Drejtoria e Apelimit Tatimor u vu në pozicionin e rishikimit të plotë të aktit administrativ. Avokati arriti të provojë se tatimi i pretenduar nuk ekziston realisht, pasi shërbimet ishin të tatueshme vetëm në vendin e rezidencës së furnitorit dhe detyrimi në Shqipëri ishte i pavlefshëm.

Ky rast jo vetëm që mbrojti klientin nga falimentimi i pashmangshëm, por krijoi edhe një precedent të vlefshëm për interpretimin e drejtë të tatimit në burim në lidhje me shmangien e taksimit të dyfishtë, në përputhje me standardet e Bashkimit Europian dhe marrëveshjet ndërkombëtare që zbaton Republika e Shqipërisë.

Rasti D… sh.p.k. kundër Drejtorisë së Tatimeve Durrës është një shembull konkret i profesionalizmit dhe vendosmërisë së avokatit Kastriot Frashëri në mbrojtjen e klientëve të tij ndaj akteve administrative të padrejta. Ky sukses tregon se argumentimi juridik, njohja e mirë e praktikave tregtare dhe korporative, provat e sakta dhe respektimi i ligjit material e procedurial janë mjetet më të forta për të siguruar drejtësi dhe për të mbrojtur integritetin e sipërmarrjeve shqiptare.

Ky rast shënon një fitore të rëndësishme jo vetëm për klientin, por edhe për praktikën e drejtësisë tatimore në Apelimet Tatimore në Shqipëri, duke vendosur një standard të ri në zbatimin e parimit të shmangies së tatimit të dyfishtë.